Lesermeinung

Über schwäbisches Essen:

Des isch scho allerhand gwä bei dem Championquiz em ZDF am Samstigobend. Erscht hen dia Kandidata Bauklötzla staunt, wo se ghört hen, dass der Gerst, der momentan wieder amol em Weltraum romfliagt, Lensa mit Schpätzla mitgnomma häb. „Kann man das überhaupt essen?“ hot no der einstige „Mischter Tagesschau“ ond Ällerweltsgscheidle Ulrich Wickert vrwondert gfrogt. Ond au dia andere Kartoffelfresser aus’m hoha Norda hen vor Verwonderong ‘s Maul nemme zukriagt. Älle hen se koi Ahnong von dr Leibspeis von ons Schwoba ghet „Ma müßt vielleicht wissen, wo der Gerst herstammt, hot no oiner gmoint“, der mit alle andere Kandidata net mitkriagt hot, dass onser Landsmann erscht vor a paar Täg enra Sonderschaltong aus’m Weltraum mit seine Landsleut auf’m Künzelsauer Marktplatz vrzählt hot, wias dohoba en der Astronautakapsel aussieht ond was er so ällas duat. Dr dickste Hond aber isch gwä, dass der Kerners Hans als Moderator selber überhaupt nex gwisst hot. Ond so au nex zur Aufklärung von der Spätzlesfrog hot beitraga könna. Dia Kerle sen scheints älle mitanander en onsra Republik no nia weiter nonder als bis an da Weißwurschtäquator komma.

© Gmünder Tagespost 30.07.2018 18:26
Ist dieser Artikel lesenswert?
Kommentar schreiben
Zu diesem Artikel wurden noch keine Kommentare geschrieben.